Tapa blanda

Gallego

Edicions Xerais

A considerada «novena arte» é o centro de interese de «Cómic e Literatura», o novo monográfico da Rede Temática de Investigación «Las Litetaruras Infantiles y Juveniles del Marco Ibérico e Iberoamericano» (LIJMI) que, cada ano, achega unha publicación co propósito de que sirva de ferramenta nas tarefas de mediación entre o libro e a lectura. Aquelas persoas interesadas neste produto híbrido entre arte e literatura, coñecido como banda deseñada (BD), cómic, historieta ou historia en cadriños, entre outras formas, atoparán nesta publicación un conxunto de estudos panorámicos da situación da BD nos ámbitos castelán, catalán, galego, portugués, vasco, brasileiro e mexicano. Tamén accederán a unha ampla selección de obras, que son exemplo de biografía gráfica literaria, de adaptación á BD de obras clásicas ou cómics atractivos formal ou tematicamente, e a un conxunto de vinte e catro análises pormenorizadas dalgún dos títulos máis significativos. «Cómic e Literatura» non deixa á marxe a importancia de educar literaria e artisticamente a partir da BD e ofrece pautas tamén nese sentido.

Edicións Xerais

Comic e literatura

«Nenas transgresoras na LIX» é o novo monográfico da Rede Temática de Investigación «Las Literaturas Infantiles y Juveniles del Marco Ibérico e Iberoamericano». Pensado para as persoas con responsabilidade directa na mediación lectora (persoal docente de diferentes etapas educativas, persoal de bibliotecas, de librarías...), pero tamén accesible para o público xeral con responsabilidade indirecta ou interesado na temática (caso das familias), esta obra achégase ás personaxes nenas que na Literatura Infantil e Xuvenil dos diferentes ámbitos do marco ibérico e iberoamericano romperon ou rompen con estereotipos de xénero. Ábrese cun estudo sobre o tratamento dos estereotipos da nenez nos contos para, a seguir, acoller aqueles traballos centrados nas literaturas infantís e xuvenís dos diferentes ámbitos (castelán, catalán, galego, portugués, vasco, brasileiro e mexicano) e como estas representan as nenas que transgriden a norma. Como é habitual nas publicacións desta rede interdisciplinar de investigadoras e investigadores, en «Nenas transgresoras na LIX» tamén se pode atopar un conxunto de obras axeitadas para educar literariamente e que abordan a temática, así como comentarios sobre algunhas das máis significativas.

Nenas transgresoras na LIX

A Rede Temática de Investigación «Las Literaturas Infantiles y Juveniles del Marco Ibérico e Iberoamericano» (LIJMI) celebra o vinte aniversario da súa creación cun recurso imprescindíbel para as persoas que investigan a Literatura Infantil e Xuvenil (LIX), pero tamén cunha ferramenta útil para aqueloutras que median entre o libro e a lectura. Con este novo monográfico, «Investigación e crítica na LIX do marco ibérico e iberoamericano (2004-2024)» danse a coñecer as accións desenvolvidas no eido da investigación e da crítica da LIX no século XXI. O lectorado interesado pode atopar nesta publicación estudos panorámicos que abordan a situación existente nos ámbitos castelán, catalán, galego, portugués, vasco, brasileiro, chileno e mexicano, así como un conxunto de obras de obrigada consulta, varias delas comentadas, que poden resultar de grande utilidade para o estudo das literaturas infantís e xuvenís do marco ibérico e iberoamericano. Entre esas obras, atópanse tamén aquelas coas que as persoas integrantes de LIJMI foron cubrindo lagoas nos estudos das literaturas infantís dos distintos ámbitos que integran esta rede de investigación.

Investigación e critica na LIX do marco iberico e iberoameri

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano" (LIJMI) achegan neste volume diversas reflexións centradas no tema Reflexos das dúas guerras mundiais na LIX, coa intención de que os profesionais da mediación entre o libro e a lectura atopen nestas páxinas un conxunto de orientacións que os axuden no seu traballo de formación literaria e á hora de elaborar seleccións temáticas.  Os diferentes ensaios abordan un corpus de obras de literatura infantil e xuvenil centradas en ambas as guerras mundiais que ofrecen un amplo abano de espazos, personaxes e situacións causadas polos conflitos. Nestes textos reitéranse, entre outros, trazos como a absurdeza de calquera guerra, as repercusións do nazismo ou actitudes de valentía e resistencia.

Reflexos das dúas guerras mundiais na LIX

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano" (LIJMI) achegan neste volume diversas reflexións sobre a representación do mundo árabe na Literatura Infantil e Xuvenil. Os mediadores entre o libro e a lectura poden atopar neste &quot; Representacións do mundo árabe na LIX &quot; estudos e comentarios que serven para observar con outros ollos o "Outro" con quen non sempre se empatiza, en moitas ocasións, por descoñecemento.

Representacións do mundo árabe na LIX

Hans christian andersen, jules verne e el quijote na literatura infantil e xuvenil do marco ibérico

Os membros da "Red Temática de Investigación sobre Literatura Infantil y Juvenil del Marco Ibérico" (LIJMI), coa colaboración doutros investigadores convidados, reúnen neste volume, coordinado por Blanca-Ana Roi Rechou, Isabel Soto López e Pedro Lucas Domínguez, un conxunto de achegas arredor do multiculturalismo e a representación da indentidade na Literatura Infantil e Xuvenil, destinadas fundamentalmente aos mediadores entre o libro e os seus receptores e que pretenden converterse nun material de consulta útil á hora de desenvovler o seu labor.  Tras dunha reflexión teórica arredor do tema proposto, o libro inclúe unha selección de obras pertencentes ao marco ibérico e a outros ámbitos lingüisticos que achegan elementos para unha interpretación da multiculturalidade, da convivencia do diverso, dende perspectivas como o contacto entre culturas, a recreación de situacións de convivencia ou de conflito, o tratamento das diferenzas e as transformacións que se operan na vida cotiá ou a presentación das particularidades que axudan ao coñecemento de culturas alleas.  Catorce destas obras son obxecto dun comentario pormenorizado, co fin de facilitarlles aos mediadores unha serie de claves de aproximación a estes textos para o seu uso na educación literaria.

Multiculturalismo e identidades permeábeis na literatura infantil e xuvenil

Os membros da "Red Temática de Investigación sobre Literatura Infantil y Juvenil del Marco Ibérico" (LIJMI), coa colaboración doutros investigadores convidados, reúnen neste volume, coordinado por Blanca-Ana Roi Rechou, Isabel Soto López e Pedro Lucas Domínguez, un conxunto de estudos, destinados fundamentalmente aos mediadores, que pretenden afondar no tema do teatro e da súa representación, dous elementos que se necesitan mutuamente e que posúen funcións, significados e características de seu. Tras dúas achegas teóricas arredor do xénero dramático e o teatro infantil e o concepto de representación, abórdanse enfoques panorámicos centrados na historia do xénero nas literaturas castelá, catalá, galega, portuguesa e vasca. O volume inclúe ademais unha selección de sesenta e unha obras da literatura dramática, realizada co obxectivo de dar a coñecer autores e autoras que destacaron pola súa traxectoria e a calidade das súas obras e por seren representantes das grandes correntes do teatro infantil do século XX. Sete destas obras son obxecto dun comentario pormenorizado, co fin de facilitarlles aos mediadores algunhas claves de aproximación a estes textos para o seu uso na educación literaria.

Teatro infantil. Do texto á representación

Os membros da "Red Temática de Investigación sobre Literatura Infantil y Juvenil del Marco Ibérico" (LIJMI), coa colaboración doutros investigadores convidados, reúnen neste volume, coordinado por Blanca-Ana Roi Rechou, Isabel Soto López e Pedro Lucas Domínguez, un conxunto de estudos, destinados fundamentalmente aos mediado-res, que pretenden afondar no tema da Guerra Civil española e a súa presenza na narrativa infantil e xuvenil.  Tras dunha introdución teórica na que se analiza o impacto e a presenza da Guerra Civil nas manifestacións culturais e artísticas das últimas décadas e a abundante bibliografía crítica xerada arredor do tema, inclúense enfoques panorámicos que abordan o tratamento do tema nas literaturas castelá, catalá, galega, portuguesa, vasca, co engadido de dúas achegas que estudan a presenza da contenda española na produción en lingua alemá e inglesa.  O volume inclúe ademais unha selección de obras narrativas nas que se trata a Guerra Civil española, dazasete das cales son obxecto dun comentario pormenorizado, co fin de facilitarlles aos mediadores e mediadoras algunha claves de aproximación para o seu uso na educación literaria.

A guerra civil española na narrativa infantil e xuvenil

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano" (LIJMI), coa colaboración doutros investigadores, reúnen neste volume unha completa serie de traballos baixo o título Inmigración/Emigración na LIX.  O volume recolle diferentes achegamentos a un corpus de obras centradas nos fluxos migratorios que sen dúbida suscitan a reflexión, pois acollen as experiencias e identidades das persoas inmigrantes ao tempo que inciden nunha visión da literatura como vehículo de comprensión da sociedade multicultural que nos toca vivir e lles ofrecen aos máis novos a oportunidade de interactuar con novas maneiras de ver e construír o mundo.

Inmigración/emigración na LIX

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano" (LIJMI), achegan un novo volume cargado de ensaios, destinados aos profesionais da mediación entre o libro e a lectura co fin de orientalos nas súas recomendacións lectoras cara á formación literaria. Retorno aos clásicos propón seleccións de obras así consideradas, tanto da Literatura Infantil e Xuvenil universal coma das respectivas literaturas que conforman esta rede de investigación. As relacións de obras incluídas son o resultado da aplicación de criterios comúns, entre eles, a calidade literaria e a permanencia e repercusión na Historia da Literatura Infantil e Xuvenil, ademais do propósito de delimitar un posíbel canon de obras de LIX nos diferentes ámbitos que se contemplan.

Retorno aos clásicos

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano" (LIJMI) reúnen neste volume unha serie de traballos baixo o título A narrativa xuvenil a debate (2000 2011). Tras dous artigos teóricos que estabelecen os trazos dominantes na narrativa xuvenil máis recente, ofrécese unha selección de obras publicadas no período estudado, pertencentes ao marco ibérico e iberoamericano e da literatura inglesa, co obxectivo de dar a coñecer obras que destacan pola súa calidade.  O volume complétase con vinte e dous comentarios críticos pormenorizados, co fin de facilitarlles ao público interesado e aos profesionais da mediación algunhas claves de aproximación para o uso destas narracións xuvenís na educación literaria.

A narrativa xuvenil a debate (2000-2011)

Os membros da Red Temática de Investigación "Las Literaturas Infantiles y Juveniles del Marco Ibérico e Iberoamericano (LIJMI) reúnen neste volume unha serie de traballos baixo o título Premios literarios e de ilustración na LIX. Partindo dunha análise introdutoria sobre o fenómeno e a importancia actual dos premios literarios á luz das liñas teóricas de inspiración sistémico-sociolóxica xurdidas no século XX, ofrécense dúas achegas aos premios internacionais e nacionais máis representativos da LIX para valorar a súa incidencia nos procesos de lexitimación dentro do sistema literario. O volume contén ademais un conxunto de panorámicas nas que se abordan os principais premios literarios e de ilustración no ámbito ibérico e iberoamericano.

Premios literarios e de ilustración na LIX

Os membros da "Red Temática de Investigación sobre Literatura Infantil y Juvenil del Marco Ibérico" (LIJMI) reúnen neste volume un conxunto de estudos baixo o título Reescrituras do conto popular (2000-2009).  A partir dunha introdución teórica que desvela as claves da reformulación dos referentes populares tradicionais no período temporal escollido, seis traballos analizan as obras máis salientábeis que responden a eses criterios nas literaturas que abrangue o marco ibérico e tamén no ámbito iberoamericano. O volume complétase cunha selección de obras, que recolle un total de cen títulos, e mais cunha bibliografía descrita que acolle algunhas das achegas máis relevantes en relación coa literatura popular, cuxo obxectivo é facilitar o labor das persoas encargadas da mediación á hora de se achegar a este tema.  Cada un dos traballos vai escrito na lingua de procedencia ou da elección dos autores, co cal se pretende dar a coñecer as linguas do marco ibérico e iberoamericano. Só se traducen ao galego, por se editar en Galicia o libro, os orixinais vascos, pola dificultade de comprensión que ofrece esta lingua non románica, así como os apartados xerais do libro.

Reescrituras do conto popular (2000-2009)

ESTE VOLUME RECOLLE UN CONXUNTO DE ESTUDOS DESTINADOS FUNDAMENTALMENTE AOS MEDIADORES, QUE PRETENDEN AFONDAR NO ÁLBUM ILUSTRADO.   Os membros da "Red Temática de Investigación " Las Literaturas Infantiles y Juveniles del Marco Ibérico e Iberoamericano" (LIJMI) reúnen neste volume unha serie de traballos baixo o título O álbum na Literatura Infantil e Xuvenil (2000-2010).  Tras dous artigos teóricos que afondan nas peculiaridades desta modalidade literaria que presenta unha especial interrelación entre texto e ilustración e estableceu un novo modo de comunicar, ler e interpretar, ofrécese unha selección de doce álbums inesquecíbeis, publicados antes da época de consolidación do álbum en todas as literaturas dos ámbitos da rede, así como unha selección de obras publicadas no período estudado, pertencentes ao marco ibérico, iberoamericano e doutros ámbitos lingüísticos, co obxectivo de dar a coñecer obras que destacan pola súa calidade.  O volume complétase con trinta comentarios pormenorizados, co fin de facilitarlles aos profesionais da mediación algunhas claves de aproximación para o seu uso na educación literaria, e mais cunha bibliografía descrita que reúne achegas de interese ao álbum.

O álbum na literatura infantil e xuvenil (2000-2010)

Os membros da Red Temática de Investigación sobre Literatura Infantil y Juvenil del Marco Ibérico e Iberomareicano (LIJMI), coa colaboración doutros investigadores convidados, reúnen neste volume un conxunto de estudos, destinados fundamentalmente a todos aqueles que desenvolven labores de mediación, centrados na Poesía infantil e xuvenil no século XXI (2000-2008).  Tras dunha introdución teórica na que se repasan a historia e as características que adoitan identificar o xénero, incídese no valor da poesía á hora de educar a sensibilidade, desenvolver a creatividade e fomentar o espírito crítico desde as primeiras idades e deféndese a súa presenza nas aulas mediante unha boa selección de textos que acolla tanto os escritos expresamente para a infancia e a mocidade como aqueloutros cun destinatario universal. A seguir inclúense enfoques panorámicos que abordan o xénero no período estudado nas literaturas castelá, catalá, galega, portuguesa e vasca, co engadido de tres achegas que estudan a poesía no ámbito literario alemán, brasileiro e inglés.  O volume inclúe ademais unha selección de poemarios, trece dos cales son obxecto dun comentario pormenorizado, co fin de facilitarlles aos mediadores e mediadoras algunhas claves de aproximación para o seu uso na educación literaria.

A poesía infantil no século XXI (2000-2008)

A memoria, no seu sentido máis amplo, é o centro de interese de «Voces da memoria na LIX», o novo monográfico da Rede Temática de Investigación «Las Literatura Infantiles y Juveniles del Marco Ibérico e Iberoamericano» (LIJMI) que, cada ano, achega unha publicación co propósito de que sirva de ferramenta nas tarefas de investigación e mediación entre o libro e a lectura. Aquelas persoas interesadas en obras como as autobiografías, os relatos de vida, as memorias, relatos de viaxes ou cartas, así como narrativas históricas, relatos biográficos, crónicas e reportaxes, entre outras, atoparán nesta publicación un artigo teórico introdutorio que dá paso a un conxunto de estudos panorámicos sobre o tratamento da memoria na Literatura Infantil e Xuvenil dos ámbitos castelán, catalán, galego, portugués, vasco, brasileiro, chileno e mexicano. Tamén accederán a unha ampla selección de obras realizada polos membros da Rede de cada ámbito, así como a un conxunto de comentarios pormenorizados doutras. Trátase, polo tanto, dunha proposta que pretende axudar á educación literaria da infancia e da xuventude vencellada coa memoria.

Voces da memoria na LIX

A monografía «A morte e as súas representacións na LIX ibérica e iberoamericana», nova publicación da Rede Temática de Investigación «Las Literaturas Infantil y Juveniles del Marco Ibérico e Iberoamericano» (LIJMI), nace co propósito de ofrecerlles un apoio teórico no seu labor de mediación a docentes, profesionais das bibliotecas, familias, animadores culturais etc. Os diferentes estudos que acolle analizan como se trata o tema da morte nas literaturas infantís e xuvenís dos diferentes ámbitos (castelán, catalán, galego, portugués, vasco, brasileiro, chileno e mexicano). Así mesmo, o lectorado interesado atopará nestas páxinas unha completa selección de títulos pertencentes a diferentes xéneros e modalidades editoriais nos que se aborda a morte desde diferentes perspectivas, vinte e oito dos cales son obxecto dun comentario pormenorizado. Un conxunto de aproximacións á morte (natural, violenta, accidental...) que axudan a desterrar esta temática do terreo do tabú.

Comic e literatura (2022)

Nenas transgresoras na LIX (2023)

Investigación e critica na LIX do marco iberico e iberoameri (2024)

Reflexos das dúas guerras mundiais na LIX

Representacións do mundo árabe na LIX (2017)

Hans christian andersen, jules verne e el quijote na literatura infantil e xuvenil do marco ibérico (2005)

Multiculturalismo e identidades permeábeis na literatura infantil e xuvenil (2006)

Teatro infantil. Do texto á representación (2007)

A guerra civil española na narrativa infantil e xuvenil (2008)

Inmigración/emigración na LIX

Retorno aos clásicos

A narrativa xuvenil a debate (2000-2011) (2012)

Premios literarios e de ilustración na LIX

Reescrituras do conto popular (2000-2009) (2010)

O álbum na literatura infantil e xuvenil (2000-2010) (2011)

A poesía infantil no século XXI (2000-2008) (2009)

Voces da memoria na LIX (2025)

A morte e as suas representacions na LIX iberica e iberoamer (2021)