Euskaldun bakoitzaren baitan filologo bat omen dago. Euskaldun askoren barrenean dialektologo bat ere bai, diotenez. Alabaina ez da hain erraza, Urtzi Regueroren kasuan bezala, filologiak eskatzen duen zehaztasuna eta dialektologia historikoak nahitaezkoa duen zorroztasuna ederki uztartzen dituen norbait aurkitzea. Monumenta Linguae Vasconum: Studia et Instrumenta sailean argitaratzen den liburu hau Urtzi Regueroren doktorego-tesiaren bertsio osatu eta emendatua da. Urtzi Reguerok Euskal Filologiako lizentziatura egin zuen Euskal Herriko Unibertsitatean. Gero, UPV/EHUn bertan, Euskal Hizkuntzalaritza eta Filologiako Masterra; master amaierako lana Erdi Aroko euskaraz idatzi zuen, ohorezko matrikula lortuz, eta lan hartan dagoeneko dialektologia historikoarekiko trebetasuna erakutsi zuen.

Filologiatik dialektologiara nafarroako euskarazko testu zaharretan barrena (1416-1750) (2020)